ෛමත්‍රී-රනිල් ඇතුළු කැබිනට්ටුව වගකියන්න ඕනෑ
-ඇමැති වසන්ත සමරසිංහ කියයි
මහපොළ අරමුදලට අයිති දේපොළක් වන මාලබේ තොරතුරු තාක්ෂණ ආයතනය කොල්ලකෑ සියලු දෙනාට එරෙහිව නීතිය ක්‍රියාත්මක කරන බව වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා පැවැසීය.
රාජ්‍ය බලය යොදා ගනිමින්, වංචනිකව එම ආයතනය අන්සතු කිරීමට එරෙහිව ආණ්ඩුවක් ලෙස ගත හැකි සියලු පියවරයන් ගන්නා බවත් එය නැවත මහපොළට පවරාගෙන රටේ දරුවන්ට වැඩි ප්‍රතිලාභ අත්කර දීමට කටයුතු කරන බවත් හෙතෙම කීවේය.
ඒ මහතා එසේ පැවසුවේ එම අමාත්‍යාංශයේ පැවැති මාධ්‍ය හමුවකට ඊයේ (16) එක්වෙමිනි.
2017 පස්වැනි මාසයේ 17 වැනිදා මෛත්‍රිපාල සිරිසේන, රනිල් වික්‍රමසිංහ, සජිත් ප්‍රේමදාස ඇතුළු කැබිනට් මණ්ඩලය මහපොළට අයිති තොරතුරු තාක්ෂණ ආයතනය සම්බන්ධයෙන් තියෙන නීතිමය අයිතිය නීතිවිරෝධිව අහෝසි කිරීමේ තීරණය ගෙන ඇති බවත් හෙතෙම පැවැසීය.
රනිල් වික්‍රමසිංහ ජනාධිපතිවරයා හැටියට ඉන්න කාලෙ 2022 මෙය නැවත පවරා ගැනීමට ඉදිරිපත් කළ කැබිනට් පත්‍රිකාව රිවස් කරන අතර මෙය කීප දෙනකු අතේ බෙදාදීමේ උවමනාවක් ඔවුන් සතුව පැවැති බව ද කී ඒ මහතා, මෙහි මුදල්වලින් කැනඩාව, අමෙරිකාව, ඕස්ට්‍රේලියාව වැනි රටවල නිවාස අරගෙන තිබෙන බවට වාර්තා වෙන බව ද කියා සිටියේය.
මේ සම්බන්ධයෙන් ගත හැකි උපරිම ක්‍රියාමාර්ග ගැනීමට ආණ්ඩුවක් ලෙස කටයුතු කරන බව ද වංචාවට සම්බන්ධ වූ සියලු දෙනා පරිස්සමින් සිටිය යුතු බව ද හෙතෙම මෙහිදී පැවැසීය.
එහිදී වැඩිදුරටත් අදහස් දැක්වූ ඒ මහතා මෙසේද පැවැසීය.
මහපොළ භාරකාර අරමුදලේ මුදල් විවිධ කාරණා නිසා අවභාවිත වෙලා තියෙනවා. සමාගම් දෙකක් හදලා, ඒ හරහා වංචා සිද්ධ වෙලා තියෙනවා. හිටපු වෙළෙඳ ඇමැති නලීන් ප්‍රනාන්දු මහපොළ වෙළෙඳපොළ පැවැත්වීම හරහා කරලා තියෙන වංචා හා ඒ හා සමාන සිදුවීම් තිබෙනවා. ඒ අතරේ රාජ්‍ය බලය අයථා ලෙස යොදා ගනිමින් මහපොළ භාරකාර අරමුදලට අයිති දේපළක් අන්සතු කිරීමට ගත්ත ක්‍රියාමාර්ගයක් විදියටයි තොරතුරු තාක්ෂණ ආයතනය සම්බන්ධ සිදුවීම පෙන්වා දෙන්න වෙන්නේ.
තරුණයන්ට වෘත්තීය අධ්‍යාපන අවස්ථා ලබාදීම, වෘත්තීය අධ්‍යාපන අවස්ථා සහිත අධ්‍යාපන ආයතන ඇති කිරීම මහපොළ භාරකාර අරමුදලේ අරමුණක් වෙනවා. ඒ අනුවයි 1998දී මහපොළ ආරම්භ වෙන්නේ. රුපියල් මිලියන 375ක් හා ජාතික
ඉතිරිකිරීමේ බැංකුවෙන් රුපියල් මිලියන 175ක් යොදා ගනිමින් මහපොළ භාරකාර අරමුදලට අයිති ඉඩමක තොරතුරු තාක්ෂණ ආයතනය ඉදිවෙන්නේ. මහපොළ මුල් පනතට අනුව මහපොළ භාරකාර අරමුදලේ සභාපතිවරයා ලෙස පත්වෙන්නේ අපේ රටේ අග්‍රවිනිශ්චකාරවරයායි. 2015 වෙනකල් තිබුණේ එහෙමයි.
2015 ආසන්නයේ රටේ අග්‍රවිනිශ්චකාරවරිය ඉවත් කිරීමට රාජපක්ෂ ආණ්ඩුව සිදුකරපු මෙහෙයුම ඔබට මතක ඇති. 2012 – 2015 කාලයේ අගවිනිසුරු නැති නිසා අරමුදලේ අධ්‍යක්ෂ මණ්ඩල රැස්වීම් තියලත් නැහැ.
2015දී අගවිනිසුරු ලෙස පත්වුණු ශ්රී පවන් මහතා අරමුදලේ සභාපතිවරයා බවට පත්ව අධ්‍යක්ෂ මණ්ඩල රැස්වීම් පවත්වනවා. 2015දී බලයට ආව රනිල් – මෛත්‍රී ප්‍රමුඛ ආණ්ඩුව එක පැත්තකින් මහා බැංකු බැඳුම්කර වංචාව කරන අතරේ අනෙක් පැත්තෙන් මහපොළ හා බැඳුණු මෙම සිදුවීමට මුල පුරනවා.
2015 වෙන් පසුව පත්කරපු අධ්‍යක්ෂ මණ්ඩල තුළ අද ජීවතුන් අතර නැති වික්‍රම වීරසූරිය කියල මහත්මයෙක් හිටියා. 2015 පෙබරවාරි – මැයි කාලය තුළ තොරතුරු තාක්ෂණ ආයතනය නීතිවිරෝධිව පවරා ගැනීමට අදාළ මෙහෙයුම ක්‍රියාත්මක වුණා.
මෑතකදී තොරතුරු තාක්ෂණ ආයතනය නිකුත් කළ මාධ්‍ය නිවේදනයක තියෙනවා ආයතනයට රජය මුල දී මුදල් දුන්නත් පසුව එවැනි මුදල් ලබා දීමක් කළේ නැහැ. මේ නිසා ආයතනය ස්වාධීන ආයතනයක් ලෙස පවත්වාගෙන යන බවට. මෙය තවමත් ඇපයෙන් සීමිත සමාගමක්. මේගොල්ලෝ ගහපු ගේම් ඇතුළෙ වෙලා තියෙන ක්‍රියාවලිය අපි සමාජයට පැහැදිලි කළ යුතුයි.
හෙටත් මේ ආයතනය මහපොළ සමඟ එකතුවෙලා තරුණයන්ට වෘත්තීය අධ්‍යාපනය අවස්ථා ලබාදෙන්න, අඩු වියදමකට හැදෑරිය හැකි පාඨමාලා ප්‍රමාණය වැඩි කරන්න අවශ්‍යයි.
ඒ සඳහා තොරතුරු තාක්ෂණ ආයතනයේ අයිතිකාරීත්වය මහපොළට ලබා ගැනීම අපේ අරමුණයි. අපට අයිති දේපළ කොල්ලකාපු අයට එරෙහිව නීතිය ක්‍රියාත්මක කරන්නත්, එහි ප්‍රතිලාභ මහපොළට අරගෙන දරුවන්ට වැඩිපුර ප්‍රතිලාභ දෙන්නත්, වෘත්තියේ අධ්‍යාපන අවස්ථා වැඩි කරන්නත් අවශ්‍ය කටයුතු කරන එක අපේ අරමුණයි.
මහපොළ භාරකාර අරමුදල විදියට මේ වන විට අධ්‍යක්ෂ මණ්ඩල රැස්වීම් 120කට වැඩි ප්‍රමාණයක් පවත්වලා තියෙනවා. 56 සහ 57 කියන අධ්‍යක්ෂ මණ්ඩල රැස්වීම් දෙකේ වාර්තාවල මේ සිද්ධිය පිළිබඳ වාර්තා වෙලා තියෙනවා. අගවිනිසුරු ශ්රී පවන් මහතා එහි සභාපතිවරයා ලෙස සිටියත්, ඔහු මේ බෝඩ් මිටින් දෙකට අත්සන් කරන්නේ නැහැ. තොරතුරු තාක්ෂණ ආයතනය සම්බන්ධයෙන් පත්කළ උපාලි අබේරත්න කොමිෂම හමුවේ සාක්ෂි දෙමින් ශ්රී පවන් මහතා පවසා තිබෙන්නේ
මෙවැනි සාකච්ඡාවක් පැවැත්වුණේ නෑ, මෙවැනි තීරණ ගත්තෙ නෑ, ඒ නිසා මේ අධ්‍යක්ෂ මණ්ඩල රැස්වීම්වලට අත්සන් කළේ නැහැ කියලා. විවිධ අවස්ථාවල, විවිධ ආණ්ඩුවල හිටපු සමහර ඇමැතිවරු සද්භාවයෙන් මෙයට උත්සාහ ගන්න ඇති කියලා අපි විශ්වාස කරනවා.
නමුත් සමහර තැන්වල බ්‍රේක් ගහලා නතර වෙලා. 56, 57 වාර්තාවලින් අධ්‍යක්ෂ මණ්ඩල තීරණ ගත්ත බවට බොරු කියමින් තොරතුරු තාක්ෂණ ආයතනයට පත්කළ කළමනාකරණ මණ්ඩලයයි, මහපොළ භාරකාර මණ්ඩලයටයි ගිවිසුමක් අත්සන් කරනවා. අපිම ගිවිසුම් ගහගෙන බෙදා ගත්තා වගේ වැඩක් තමයි කරලා තියෙන්නේ. ඊට පස්සේ තමයි රනිල්, මෛත්‍රී ආණ්ඩුව මේ ආයතනය අපට අහිමි කරන්නේ.
ඊට පස්සේ 2018 විජයදාස රාජපක්ෂ මහත්තයා තොරතුරු සහිතව කැබිනට් පත්‍රිකාවක් ඉදිරිපත් කරමින් මෙය නිවැරදි විය යුතු බව කියනවා. ඒත් ඒ කැබිනට් පත්‍රිකාව රිවස් වෙන්නෙ නැතුව විජයදාස මහතාට උපදෙස් ලැබෙනවා නීතිපතිගෙන් උපදෙස් ගන්න කියලා. නැවත 2020 වර්ෂයේ දී බන්දුල ගුණවර්ධන මහතා නැවත කැබිනට් පත්‍රිකාවක් දාපුවම ඊට අදාළව කමිටුවක් පත්කරනවා විමර්ශනය කරලා වාර්තාවක් දෙන්න. මේ කමිටුවේ සාමාජිකයෝ වෙන්නේ නිමල් සිරිපාලද සිල්වා, දිනේෂ් ගුණවර්ධන, පවිත්‍රා වන්නිආරච්චි, විමල් වීරවංශ. ඒ කමිටුවෙන් හදපු කොමිෂන් වාර්තාවකුත් නෑ.
2022 දෙවැනි මාසෙ 17 වැනිදා බන්දුල ගුණවර්ධන මහතා නැවතත් කැබිනට් පත්‍රිකාවක් දාපුවම තොරතුරු තාක්ෂණ ආයතනය 2015ට පෙර තිබූ තත්ත්වයට නැවත පත් කරන්න කියනවා. තොරතුරු තාක්ෂණ ආයතනයේ දැන්වීමක් දාලා කියන සුන්දර කතාවක් නෙමෙයි මෙතන තියෙන්නේ. මේක දැවැන්ත වංචාවක්. නැවත රනිල් වික්‍රමසිංහ ජනාධිපතිවරයා හැටියට ඉන්න කාලෙ 2022 කැබිනට් පත්‍රිකාව නැවත රිවස් කරන්න කියනවා. මෙය කීප දෙනකු අතේ බෙදලා දෙන්නා ඔවුන්ට උවමනාවක් තිබිලා තියෙනවා. මේකේ සල්ලිවලින් කැනඩාව, අ‍ෙමරිකාව,
ඕස්ට්‍රේලියාව වගේ රටවල ගෙවල් අරගෙන තියෙන බවට ආරංචි තියෙනවා.
උපාලි අබේරත්න කොමිසම පවතින ගිවිසුම් අහෝසි කර මහපොළ උසස් අධ්‍යාපන භාරකාර අරමුදලේ සියලු භාරකරුවන්ගේ යෝජන සම්මුතියක් සහිතව පරමාර්ථවලට පටහැණි නොවන වැඩිලාභාංශ ලැබෙන පරිදි සුදුසු කොන්දේසි ඇතුළත් කර නව ගිවිසුමකට එළැඹෙන්න කියලා නිර්දේශ කරලා තියෙනවා.
මේ කියන්නේ තොරතුරු තාක්ෂණ ආයතනයට මහපොළේ අරමුණුවලට පිටින් යන්න බැහැ කියලයි. අරමුදලේ අනුමැතියක් නොමැතිව මාලබේ උසස්
අධ්‍යාපන ආයතනයේ පිහිටී ඉඩම වංචනිකව ලෙස බැහැර කිරීම සඳහා 2015 මැයි 12 දින අංක රහිත අසත්‍ය කරුණු මත පදනම් වූ ගිවිසුම් හා 2015 මැයි 12 දින අංක 952 දරන බදු ගිවිසුම් සෑදීමෙන් දණ්ඩනීති සංග්‍රහයේ 15 වැනි අධිකාරිය යටතේ දඬුවම් ලැබිය හැකි වරදක් සිදුකර තිබීමක් බව වාර්තාවේ සඳහන් වෙනවා.
දඬුවම් ලැබිය හැකි වැරදිවලට සම්බන්ධ වෙලා තියෙන නිසා මේවා මඟහරින්න බෑ. අවසානයේ මෙහි වැරදිකරුවන් කවුද කියලත් සඳහන් කර තිබෙනවා.
ඉහත නිර්දේශ පරිදි පහත දැක්වෙන පුද්ගලයන්ට එරෙහිව නීතිමය ක්‍රියාමාර්ග ගැනීමට මෙම නඩුවට අදාළ සියලු සාක්ෂි ලේඛන නීතිපතිතුමා හෝ අල්ලස් කොමිසමට යොමු කරන්න කියනවා. තොරතුරු තාක්ෂණික ආයතනයේ අධ්‍යක්ෂ මණ්ඩලය නැවත පත්කිරීමේ අයිතිය මහපොළට ලබා ගැනීමටත්, තොරතුරු තාක්ෂණ ආයතනය තවදුරටත් කාර්යක්ෂමව, පෞද්ගලික ගිණුම්වලට
ගිය සල්ලි තොරතුරු තාක්ෂණ ආයතනයෙත් මහපොළෙත් අභිවෘද්ධිය වෙනුවෙන් යොදවලා, වැඩි පිරිසකට අවස්ථා හදන්න භාවිත කරන අතර මේ වංචාවට සම්බන්ධ පුද්ගලයන්ට නීතිමය ක්‍රියා මාර්ග ගැනීමට අල්ලස් හෝ දූෂණ විමර්ශන කොමිසමට පැමිණිලි කරන්නත් තීරණය කරලා තියෙනවා. වගකිවයුතු පුද්ගලයෝ ලෙස සඳහන් කරලා තියෙන්නේ අමාත්‍ය ගාමිණී ජයවික්‍රම පෙරේරා (මියගිහින්), ආචාර්ය වික්‍රම වීරසූරිය (මියගිහින්), නීතිඥ අනිල් රාජපක්ෂ, මහාචාර්ය ලලිත් ගමගේ නම් කරලා තියෙනවා. මේ අයට විරුද්ධව නීතිමය ක්‍රියාමාර්ග ගන්න ජනාධිපති කොමිෂන් වාර්තාවක් තියෙනවා. තොරතුරු තහවුරු කර තිබෙනවා.
2015 මැයි 12දා මේ ගිවිසුම ගහන අවස්ථාවේ මහපොළ භාරකාර අරමුදලට අයිති තොරතුරු තාක්ෂණ ආයතනයේ ගිණුම්වල රුපියල් මිලියන 1169ක් තියෙනවා. ඒක අයිති මහපොළටනේ.
හැබැයි ඒ රඳවාගත් ලාභවලින් මහපොළ පත්කරපු අධ්‍යක්ෂවරු තොරතුරු තාක්ෂණ ආයතනයේ ගිණුමෙන් රුපියල් මිලියන 408ක් මහපොළට දීල තොරතුරු තාක්ෂණ ආයතනය ලියාගන්නවා.
කරලා තියෙන්නේ මහපොළේම සල්ලි දීලා, තොරතුරු තාක්ෂණ ආයතනය ලියාගන්න එකයි.
මෛත්‍රීපාල සිරිසේන, රනිල් වික්‍රමසිංහ ඇතුළු කැබිනට් මණ්ඩල මේකට වග කියන්න ඕන. උපාලි අබේරත්න කොමිෂන් සභා වාර්තාවේ සම්බන්ධ වුණු සියලු දෙනා ගැන සඳහන් වෙනවා.
මහපොළට අයිති තාක්ෂණික ආයතනය මහපොළට තියෙන්න ඕනේ. ඒකෙ ප්‍රතිඵල දරුවන්ට යන්න ඕනේ.
දැනුත් මහපොළේ බිලියන 22ක් තියෙනවා. ළමයි 76,000කට ශිෂ්‍යත්ව දෙනවා. තව දරුවන්ට මීට වඩා අඩුවෙන් වෘත්තීය පුහුණු පාඨමාලා උගන්නන්න පුළුවන්. ඒ සඳහා අධ්‍යාපන ආයතනය ශක්තිමත්ව පවත්වාගෙන යන්න කළමනාකරණ මණ්ඩලයක් පත් කිරීමටත්, වංචනික ගනුදෙනුවට අදාළ වැරදිකරුවන්ට දඬුවම් දෙන්නත් ගතයුතු උපරිම ක්‍රියාමාර්ග ගන්න අපි කටයුතු කරනවා.
අනුන්ගේ දේපළවලට හිමිකම් කියන්න උත්සාහ කළාට තවමත්, එහි හිමිකම තියෙන්නේ මහපොළ භාරකාර අරමුදලට බවත් මතක් කරනවා.
මෙම අවස්ථාවට මහපොළ භාරකාර අරමුදලේ සභාපති, ශ්‍රේෂ්ඨාධිකරණයේ විශ්‍රාමික විනිසුරු විජිත් මලල්ගොඩ මහතා ද එක්වූහ.