මුදල් අමාත්‍යාංශය විසින් ඩීසල් බලයෙන් ක්‍රියාත්මක වන ද්විත්ව කැබ් රථ 1,775ක් මිලදී ගැනීම සඳහා පසුගිය බ්‍රහස්පතින්දා (ඔක්තෝබර් 23) දින රුපියල් බිලියන ගණනක ටෙන්ඩරයක් ඉදිරිපත් කර ඇති අතර, උනන්දුවක් දක්වන පාර්ශ්වයන්ට සිය ලංසු ඉදිරිපත් කිරීමට ලබා දී ඇත්තේ දින 12ක කෙටි කාල සීමාවකි.
ජාතික තරගකාරී ලංසු තැබීමේ ක්‍රියාපටිපාටිය යටතේ නවතම ෆෝවීල් ස්වයංක්‍රීය සම්ප්‍රේෂණ ඩීසල් ද්විත්ව කැබ් රථ ප්‍රසම්පාදනය සඳහා මුද්‍රා තැබූ ලංසු කැඳවා තිබේ.
ලංසුකරුවන්ට ලංසු ලේඛන ඔක්තෝබර් 23 සහ 2025 නොවැම්බර් 3 අතර මිලදී ගත හැකි වුවද, ලංසු භාරගැනීමේ අවසන් දිනය සහ වේලාව ලෙස දක්වා ඇත්තේ 2025 නොවැම්බර් 4 වැනිදා පස්වරු 2 .00 යි.
ස්වයංක්‍රීය සම්ප්‍රේෂණ ද්විත්ව කැබ් රථයක වත්මන් විකුණුම් මිල රුපියල් මිලියන 23ත් 24.7ත් අතර වන බව වාර්තා වන අතර, අවම මිල ගණන් යටතේ මෙම මුදල් අමාත්‍යාංශයේ ටෙන්ඩරයේ වටිනාකම ආසන්න වශයෙන් රුපියල් බිලියන 40.8ක් ලෙස තක්සේරු කෙරේ.
ලංසු ඉදිරිපත් කිරීමට ලබා දී ඇති කෙටි කාල සීමාව හේතුවෙන් මෙවර පූර්ව ලංසු රැස්වීමක් (pre-bid meeting) නොපැවැත්වේ.
සුදුසුකම් ලැබීමේ ප්‍රධාන කොන්දේසි ලෙස ඉදිරිපත් කර ඇත්තේ, වාහන ආනයන තහනමට පෙර කාලපරිච්ඡේදය වන 2017-19 කාලය තුළ ලංසුකරු අවම වශයෙන් රුපියල් බිලියන 10ක වාර්ෂික සාමාන්‍ය පිරිවැටුමක් පවත්වා ගෙන ගොස් තිබීම, රට පුරා ලංසුකරුගේ හිමිකාරිත්වය යටතේ අවම වශයෙන් සේවා සහ අලුත්වැඩියා මධ්‍යස්ථාන දහයක් පවත්වාගෙන යා යුතු අතර, ඉන් පහක් බස්නාහිර පළාතෙන් පිටත පිහිටා තිබීම මෙන්ම බලයලත් ස්ථාන (Franchises) හෝ ආශ්‍රිතයන් පිළිනොගන්නා බවය.
කෙටි දැනුම්දීමකින් ටෙන්ඩරය වසා දැමීමට හේතුව පැහැදිලි වූයේ නැත.
කෙසේවෙතත් මෙම වාහන සමූහය ඇණවුම් කිරීමට මුදල් අමාත්‍යාංශය සැප්තැම්බර් මාසයේදී විවිධ අමාත්‍යාංශ ලේකම්වරුන් සහ දෙපාර්තමේන්තු ප්‍රධානීන්ගෙන් තොරතුරු රැස් කිරීම ආරම්භ කළේ රජයේ සංවර්ධන වැඩසටහන් “කඩිනම් හා කාර්යක්ෂම ලෙස” ක්‍රියාත්මක කිරීම පහසු කිරීමේ අරමුණ ඇතිවය.
භාණ්ඩාගාර ලේකම් හර්ෂණ සූරියප්පෙරුම ගේ චක්‍රලේඛයක සඳහන් වූයේ කෘෂිකර්මාන්තය, වාරිමාර්ග, ඉඩම්, වනජීවී, වන සංරක්ෂණය සහ ප්‍රාදේශීය පරිපාලනය වැනි අංශවල ගැටලු කඩිනමින් විසඳීම අවශ්‍ය බවයි.
එම චක්‍රලේඛයේ මෙසේද සඳහන් විය: “ප්‍රමාණවත් වාහන සංඛ්‍යාවක් සහ යන්ත්‍රෝපකරණ නොමැතිකම, බොහෝ පැරණි ඒවා සඳහා ඉහළ නඩත්තු පිරිවැයක් සමඟ, අඛණ්ඩ සංවර්ධන කටයුතු සඳහා බාධාවක් වී ඇත.”
“රාජ්‍ය ආයතන සඳහා අත්‍යවශ්‍ය වාහන සහ යන්ත්‍රෝපකරණ ගණනාවක් හදිසි මිලදී ගැනීම සඳහා කැබිනට් අනුමැතිය ලබා දී ඇති අතර, 2025 වසර සඳහා මුළු වාහන අවශ්‍යතාවයෙන් නිශ්චිත ද්විත්ව කැබ් රථ සංඛ්‍යාවක් මිලදී ගැනීමට රජය තීරණය කර ඇත.”
මෙම රජයේ අවශ්‍යතාවය සපුරාලීම සඳහා මිලදී ගන්නා පළමු වාහන කාණ්ඩය මෙම ද්විත්ව කැබ් රථ වේ.
මූලාශ්‍රය- Sunday Time