පැවැත්වීමට නියමිත ජනාධිපතිවරණය සදහා ඒකාබද්ධ විපක්ෂය නියෝජනය කරන ජනාධිපති අපේක්ෂකයා ලෙස ශ්‍රී ලංකා පොදුජන පෙරමුණේ සංවිධායක, හිටපු ඇමති බැසිල් රාජපක්ෂ නම් කරන්නේ නම් තමන් ඉතාම සතුටු වන බව ඒකාබද්ද විපක්‍ෂයේ පාර්ලිමේන්තු මන්ත්‍රී විමලවීර දිසානායක පවසනවා.
පසුගියදා පැවති අම්පාර දිස්ත්‍රීක් ශ්‍රී ලංකා පොදුජන පෙරමුණේ නියෝජිත හමුවක් අමතමින් මන්ත්‍රීවරයා මේ බව කියා සිටියා. දේශපාලනයේ නායකයන් කිහිප දෙනෙක් සිටිය නොහැකි බවත් තමන් ගරු කරන එකම නායකයා මහින්ද රාජපක්ෂ මහතා බවත්, මහින්ද රාජපක්ෂ හිටපු ජනපතිවරයා විසින් නම් කරන පුද්ගලයෙකුට තම සහයෝගය ලබා දීමට සූදානම් බවද මන්ත්‍රීවරයා සදහන් කරනවා.
ඉන්පසුව සභාව ඇමතූ හිටපු ඇමති බැසිල් රාජපක්ෂ කියා සිටියේ ජනාධිපති අපේක්ෂකයා ලෙස ඉදිරිපත් කිරීමට සුදුසුම පුද්ගලයා මහින්ද රාජපක්ෂ මහතා බවයි. එමෙන්ම මහින්ද රාජපක්ෂ මහතා විසින් කම් කරන ඕනෑම පුද්ගලයෙකුගේ ජයග්‍රහණය සදහා කැපවන බවද හිටපු අමාත්‍යවරයා සදහන් කළා.