(ලංකා ඊ නිව්ස් -2018.සැප්.08, ප.ව.7.25) සිංහල බෞද්ධ රාජ්‍යයක් හැදීමට අවශ්‍ය දකුණේ මාධ්‍ය තමාන්ව බිල්ලට දුන් බවත්, තමන් කළ ප්‍රකාශයට වඩා රටේ ආරක්ෂාවට තර්ජනයක් වන අන්දමේ ප්‍රකාශයන් කළ දේශපාලනඥයින් මේ රටේ කොතෙකුත් සිටින බවත් වනිතා කටයුතු පිළිබඳ හිටපු ඇමතිනී විජයකලා මහේස්වරන් මන්ත්‍රීවරිය ප්‍රකාශ කළාය. යාපනයේ පැවති උත්සවයකදී රාජ්‍ය විරෝධී යැයි කියන ප්‍රකාශයක් කළේ යැයි යන චෝදනාව මත ඇයට එරෙහිව නඩු පවරණ මෙන් නීතිපතිවරයා පොලිස්පතිවරයාට දැනුම් දී ඇතැයි යන තත්ත්වය සම්බන්ධයෙන් මන්ත්‍රීවරියගෙන් කරුනු විමසූ අවස්ථාවේදී ඇය මේ බව කියා සිටියාය.
මහේෂ්වරන් මහත්මිය එල්ටීටීඊ සංවිධානය ගැන ප්‍රකාශය සම්බන්ධයෙන් දණ්ඩ නීති සංග්‍රහය අනුව කටයුතු කරන ලෙස නීතිපතිවරයා පොලිස්පතිවරයාට උපදෙස් ලබා දී තිබේ. දණ්ඩ නීති සංග්‍රහයේ 120 වැනි වගන්තියේ ප්‍රතිපාදන අනුව කටයුතු කරන ලෙස නීතිපතිවරයා දැනුම් දුන් බවත් ඒ අනුව මන්ත්‍රීවරිය අත්අඩංගුවට ගන්නවාද එසේ නැතිනම් ඇයට එරෙහිව කෙළින්ම නඩු පවරනවාද යන්න ගැන මේ වන තෙක් තීරණයක් ගෙන නැතැයි ද පොලිසිය ප්‍රකාශ කරන ලදැයි දකුණේ මාධ්‍ය වාර්තා කර තිබිණ.
නීතිපතිවරයා පවසන ඉතා පැරණි රජකාලේ නීතියක් වන දණ්ඩ නීති සංග්‍රහයේ 120 වැනි වගන්තියේ මෙසේ දැක්වේ.
‘‘විරුද්ධත්වය ඇවිස්සීම හෝ ඇවිස්සීමට තැත් කිරීම‘‘
‘‘කතා කරනු ලැබූ හෝ කියැවීමට අදහස් කරනු ලැබූ වචනයෙන් හෝ සංඥාවලින් හෝ දැකිය හැකි නිරූපනවලින් පිහිටුවනු ලැබූ ලංකාණ්ඩුවට විරුද්ධත්වය දැක්වීමේ හැඟීම් අවුස්වතොත් හෝ ඇවිස්සීමට තැත් කරතොත් හෝ නීතිය ක්‍රියාවෙහි යෙදවීමේදී වෛරයක් ඇති කරවතොත් හෝ ඇති කරවීමට තැත් කරතොත් නිත්‍යනුකූල මාර්ගවලින් නොව අන් ලෙසකින් නීතියෙන් පිහිටවනු ලැබූ යමක් වෙනස් කර වීමට රජතුමාගේ වැසියන් උනන්දු කරතොත් හෝ රජතුමාගේ වැසියන් අතර අසංතෝෂයක් හෝ විරුද්ධත්වය ඇති කරවීමට හෝ එබඳු වැසියන්ගේ වෙනස් පංති අතර සතුරුවූද, අසමගිවූද හැඟීම් වැඩි දියුණු කිරීමට තැත් කරතොත් ඔහු අවුරුදු දෙක දක්වා කාලයක් ලිහිල් බන්ධනාගාර ගත කිරීමකින් දඬුවම් ලැබිය යුතුය.‘‘
මේ සම්බන්ධයෙන් වැඩි දුරටත් අදහස් දැක්වූ විජයකලා මන්ත්‍රීවරිය කියා සිටියේ තමන් කී දේ සත්‍යතාවය පිළිබඳව තමන්ට අධිකරණයේදී හෝ යමක් ප්‍රකාශ කිරීමට අවස්ථාව ලැබීම තමන් වෙනුවෙන් ඉතිරිව ඇති එකම දේ පමණක් බවයි . ඒ අවස්ථාව එන තෙක් ඇය නිහඬව සිටින බවත් කියා සිටියාය.
මන්ත්‍රීවරියට එරෙහිව නඩු පවරණ බව වාර්තා වීමත් සමගම උතුරේ මාධ්‍යවේදීන් වහාම ඇයගෙන් මාධ්‍ය සාකච්ඡාවක් ඉල්ලා සිටියහ. ඒ මේ සම්බන්ධයෙන් ඇයගෙන් ප්‍රතිචාරයක් ලබා ගැනීමටය. ඒ සියළු ඉල්ලීම් මන්ත්‍රීවරිය ප්‍රතික්ෂේප කරමින් කියා සිටියේ තවත් නැති ලෙඩක් දමා ගැනීමට මේ අවස්ථාවේදී අනවශ්‍ය බවයි.
''මාව මේ තත්ත්වයට පත් කළෙත් දකුණේ මාධ්‍යය තමයි. නැති දේවල් කළෙත් ඔය මාධ්‍යම තමයි. මාධ්‍යයට අවශ්‍යවී තිබෙන්නේ දකුණේ සිංහල බෞද්ධ රාජ්‍යයක් ගොඩ නැගීම සඳහා පමණයි. ඒ වෙණුවෙන් බිල්ලට දිය යුතු උදවිය බිල්ලට දීම මාධ්‍යයේ ස්වභාවය වී තිබෙනවා.
මේ අවස්ථාවේදී මම යළිත් හෝ දෙයක් මාධ්‍යට ප්‍රකාශ කිරීමට ගියහොත් පෙරට වඩා සංකීර්ණ තත්ත්වයක් ඇතිවිය හැකියි.
මම කළින් කී දේ යළිත් ප්‍රකාශ කිරීමෙන් අනතුරුව තමයි මට අළුත් අදහසක් ප්‍රකාශ කළ හැකි වන්නේ. ඒ නිසා ඒක තවත් භයානක තත්ත්වයක් වෙනවා. ඒක නිසා මේ අවස්ථාව මාධ්‍ය සාකච්ඡා තබන්නට අවස්ථාවක් නොවෙයි. ''
විජයකලා මහේස්වරන් මන්ත්‍රීවරිය කියා සිටියාය.
දිනසේන රතුගම‌ගේ
ලංකා ඊ නිව්ස්