විශ්වවිද්‍යාල ශාස්ත්‍රඥයන්ගෙන් ඉල්ලීමක්,
මේ මොහොතේ ශ්‍රී ලංකාවේ ඇති වී තිබෙන දේශපාලන ව්‍යාකූලත්වය පිළිබඳව අවස්ථාවාදීන් විසින් කුමක් කීවත් ශාස්ත්‍රඥයන් ලෙස නිහඬව සිටීම අප සතු යුතුකම් පැහැර හැරීමක් බව අපගේ අදහසයි. ප්‍රජාතන්ත්‍රවාදී මැතිවරණයකදී ජනතා ඡන්දයෙන් පත් කරන ලද ජනතා නියෝජිතයන්ගෙන් සමන්විත පාර්ලිමේන්තුවද ව්‍යවස්ථානුකූල අග්‍රාමාත්‍යවරයාද සිටියදී අත්තනෝමතික ලෙස තවත් අග්‍රාමාත්‍යවරයෙකු පත්කිරීමට ශ්‍රී ලංකාවේ ජනාධිපතිවරයාට ආණ්ඩුක්‍රම ව්‍යවස්ථාවෙන් කිසිදු බලයක් පවරා නැත. ආණ්ඩුක්‍රම ව්‍යවස්ථාවට ගෙන ආ 19 වැනි සංශෝධනය අනුව ධුරය දරන අග්‍රාමාත්‍යවරයා ඉල්ලා අස් වුවහොත් හෝ පාර්ලිමේන්තුවේ විශ්වාස භංග යෝජනාවකින් පරාජය වුවහොත් හැර ජනාධිපතිවරයා ගේ සිතැඟි පරිදි ඉවත් කළ නොහැකිය. ඒ අනුව ශ්‍රී ලංකාවේ මේ මොහොතේ ඇති වී තිබෙන දේශපාලන අර්බුදය ජනාධිපතිවරයා විසින් සිය අවස්ථාවාදී දේශපාලන වාසි තකා නිර්මාණය කරන ලද අත්තනෝමතික බල හුවමාරුවක් ලෙස පෙන්වා දිය හැකිය.
මෙම තීරණයත් සමග 2015 ජනවාරි 8 වැනිදා පරාජයට පත්කළ දූෂිත, ජාතිවාදී, ආගම්වාදී බලවේග නැවත කරළියට පැමිණීම මෙරට ප්‍රජාතන්ත්‍රවාදය අගයන ජනතාවගේ ජීවිත දැඩි ලෙස තර්ජනයට ලක් කර තිබේ. කුමන්ත්‍රණකාරී ලෙස ජනමතය කොල්ල කමින් පාර්ලිමේන්තුව අත්තනෝමතික ලෙස වාරාවසාන කරගෙන සිටින තත්ත්වයක් තුළ ශ්‍රී ලංකාව දැඩි ලෙස ජාත්‍යන්තර අපකීර්තියට පත් වෙමින් තිබෙන අතර අස්ථාවර සහ අරාජික රාජ්‍යයක් ලෙස ජන ජීවිතය වියවුලට පත් කරමින් තිබේ. ශාස්ත්‍රඥයන් සහ ශ්‍රී ලංකාවේ වගකිවයුතු පුරවැසියන් ලෙස අප ජනාධිපතිවරයාගෙන් ඉල්ලා සිටින්නේ රට තවත් වියවුලටත් අපකීර්තියටත් පත් නොකර ජාත්‍යන්තරයද ඉල්ලා සිටින පරිදි ජනමතය හෑල්ලුවට ලක් නොකර වහා පාර්ලිමේන්තුව කැඳවා මේ ඇතිවී තිබෙන භයානක තත්ත්වයෙන් පුරවැසියන් මුදවා ගන්නා ලෙසත් ශ්‍රී ලංකාවේ යළි ප්‍රජාතන්ත්‍රවාදය ස්ථාපිත කරන ලෙසත්ය.