ජනාධිපති සිරිසේන විසින් අද (06) ට යෙදී තිබෙන දීපවාලි දින සැමරුම වෙනුවෙන් වූ මාධ්‍ය නිවේදනය නැවත සංස්කරණය කර ඇත.
ජනාධිපති සිරිසේන විසින් ඊයේ ජනාධිපති මන්දිරයේ පැවති දීපවාලි සැමරුම් උත්සවයේදී දැක්වූ අදහස් ලෙස උපුටා දක්වමින් අද (06) ජනාධිපති මාධ්‍ය අංශය නිකුත් කළ නිවේදනයේ අර්ථය මුළුමනින් වෙනස් කරමින් මෙම සංශෝධිත නිවේදනයද අද නිකුත් කර තිබේ.
ඊට අනුව පළමු නිවේදනයේ සඳහන්වූ කරුණු රැසක් දෙවන නිවේදනයේ ඇතුළත්ව නැත.
එනම්, උතුරේ ජනතාවට අයත් ආරක්ෂක අංශ භාරයේ පැවති ඉඩම් සියයට අනූවක් පමණ මේ වන විට නිදහස් කර අවසන්ව පවතින බව, උතුරේ පන්සල්, පල්ලි සහ කෝවිල්වලට අයත් සියලූ ඉඩම් කඩිනමින් නිදහස් කරන ලෙස ජනාධිපතිවරයා අදාළ අංශ වෙත උපදෙස් ලබාදී තිබෙන බව, යන කරුණු කිසිවක් දෙවන නිවේදනයේ සඳහන්ව නැත.
එසේම පසුගිය වසර තුන හමාර තුළ ජනාධිපතිවරයා ලෙස උතුරේ ජනතාවගේ ප්රශ්න පිළිබඳව ඉතා වගකීමෙන් කටයුතු කළ බව, අගමැතිවරයා වෙනස් කිරීමට ද තමා තීරණය කළේ රටේ ප්රශ්න මෙන්ම උතුරේ ජනතාවගේ ද ජන ජීවිතය පිළිබඳ ප‍්‍රශ්නවලට නිසි විසඳුම් නොලැබීම නිසා බව යන කරුණුද පළමු නිවේදනයේ ඇතුළත් නමුත් ඒ කිසිවක් දෙවන සංශෝධිත නිවේදනයේ නැත.
තවද උතුරේ සිරකරුවන්ගේ ගැටලූව විසඳීම පිළිබඳ යම් සහනදායී වැඩපිළිවෙළකට ළඟදීම එළැඹෙන බව සහ ඒ සඳහා ගතයුතු තීන්දු තීරණ පිළිබඳ සොයා බැලීමට නීතිපතිවරයා ඇතුළු නිලධාරීන් සමඟ සාකච්ඡා කිරීම, විපක්ෂනායක ආර්, සම්බන්ධන් මහතා ඇතුළු ද්‍රවිඩ ජාතික සන්ධානයේ නියෝජිතයින් ද ඊට සහභාගී කරවා ගන්නා බවද පළමු නිවේදනයේ සඳහන්ව ඇති නමුත් සංශෝධිත නිවේදනයද එහි සඳහන්ව නොමැත.
තවද මෙම වැඩපිළිවෙළ පිළිබඳ ජනාධිපතිවරයා නව අග‍්‍රාමාත්‍යවරයා සමග ද සාකච්ඡා කළ බවත්, උතුරේ ජනතාවගේ ගැටලූ විසදීම පිළිබඳ ජනාධිපතිවරයා තුළ තිබූ දැඩි දේශපාලන ස්ථාවරය හෙට දවසේ ද එළෙසම පවතින බවත් පළමු නිවේදනයේ සඳහන් වුවත් සංශෝධිත නිවේදනයේ ඒ කිසිවක්ද සඳහන්ව නැත.
අවස්ථාවාදී තීන්දුවක් !
කෙසේ වුවත් මේ සම්බන්ධව ලැබෙන ආරංචි මාර්ග සඳහන් කර සිටින්නේ අද (06) නිකුත් කළ පළමු නිවේදනය හරහා දෙමළ ජාතික සන්ධානයේ සහය ආණ්ඩුවට ලබා ගැනීම ඉලක්ක කරමින් නිකුත් කරනු ලැබූවක් බවය.
මේ වන විටත් කුමන්ත්‍රණ ආණ්ඩුවට පාර්ලිමේන්තුවේ 113 ක බහුතරය සකසා ගන්නට නොහැකිවූ පසුබිමේ මෙවැනි නිවේදනයක් හරහා විපක්ෂ නායක ආර්.සම්බන්ධන් ඇතුළු ද්‍රවිඩ ජාතික සන්ධානයේ සහ උතුරේ දමිළ පක්ෂ වල හිත දිනාගැනීමේ අපේක්ෂාව ඒ පසුපස තිබූ බවත් ජනාධිපති මාධ්‍ය ඒකකයේ නව උපදේශකවරයෙකුගේ අනුදැනුම මත එය සැකසූ බවත් දැනගන්නට ඇත.
නමුත් පසුව කුමන්ත්‍රණ ආණ්ඩුවේ අගමැති මහින්ද ඇතුළු පාර්ශවය එම නිවේදනයට විරෝධය දක්වා ඇති අතර කිසිසේත් කතා නොවූ කරුණු නිල නිවේදනයකට ඇතුළත් කිරීම හරහා තමන්ගේ දකුණේ ජනමතයට හානියක් සිදුවන බවත්, එබැවින් වහාම එම නිවේදනය සංශෝධනය කරන ලෙසත් එහිදී එම පාර්ශවය ජනාධිපති මාධ්‍ය අංශයට නියෝග කර තිබෙන බවද වාර්තා වෙයි.
තවද දීපවාලි නිවේදනයක් නිකුත් කළ පමණින් ද්‍රවිඩ ජාතික සන්ධානය සිරිසේන ජනාධිපති ප්‍රමුඛ ආණ්ඩුවට සහය දෙනු ඇතැයි වැනි විකාර අදහස් තබාගෙන සිදුකරගත් ආණ්ඩු පෙරළිය ඉදිරියට ගෙනයාමට නොහැකි බවද එහිදී රාජපක්ෂ පාර්ශවය ජනාධිපති මාධ්‍ය අංශය වෙත දන්වා ඇත.
හිනායන වැඩ කරන්න එපා !
මේ ආණ්ඩුව පවතින තුරු ද්‍රවිඩ ජාතික සන්ධානයේ සහය ඊට ලැබෙනවා කියා සිතනවා නම් එය සිදුවිය යුතුව තිබුණේ " දෙමළ දේශපාලන සිරකරුවන් නිදහස් කරන බවට" නාමල් රාජපක්ෂ මන්ත්‍රීවරයා නිකුත් කළ නිවේදනය අවස්ථාවේ බවත් අනෙක් අතට අගමැති රනිල් වික්‍රමසිංහ ඉවත් කිරීමට හේතුවූ කරුණක් ලෙස උතුරේ ජනතාවගේ ප්රශ්න නොවිසදීම හේතුවක් බවට දැක්වීම මිනිසුන්ගේ හිනාවට මිස දෙමළ ජනතා සහය ලැබීමට කිසිසේත් හේතුවක් නොවන බවද රාජපක්ෂ පාර්ශවය වැඩිදුරටත් එහිදී දන්වා ඇති බවද වාර්තා වෙයි.
තමන් කරන්නේ කියන්නේ කුමක්දැයි ජනාධිපති නොදනී !
මේ අනුව පෙනී යන්නේ උතුරේ ජනතාවගේ ප්‍රශ්නය සිරිසේන - මහින්ද කුමන්ත්‍රණ ආණ්ඩුව විසින් අවස්ථාවාදී ආකාරයට යොදා ගැනීමේ නින්දිත උත්සාහයක් තිබී ඇති බවයි. මීට පෙර පාර්ලිමේන්තු මන්ත්‍රී නාමල් රාජපක්ෂ ද උතුරේ දේශපාලන සිරකරුවන් නිදහස් කිරීමේ සූදානමක් ගැන ට්වීටර් පණිවිඩ තබා තිබුණේ ඒ පෙන්වා එම ජනතාවට කැරට් අල කැවීමට බවද මෙයින් පැහැදිළි වේ.
එසේම මේ වන විට ජනාධිපති සිරිසේන ගේ නිල රාජකාරි සිදුවන්නේ ඔහුගේ පාලනයෙන් තොරව බවත් කිසිඳු වග විභාගයකින් තොරව දේවල් සිදුවෙමින් ඇති බවත් මේ හරහා නැවත ඔප්පු වෙයි.
පහත දැක්වෙන්නේ ජනාධිපති මාධ්‍ය අංශය විසින් අද නිකුත් කළ දීපවාලි නිවේදනය සහ සංශෝධිත නිවේදනයයි.
Newstube.lk
