අද වනවිට විහිළුවක් බවට පත්ව ඇති මෙරට දේශපාලනයට සදාචාරයක් අවශ්‍ය බව ආචාර්ය හරිනි අමරසුරිය පවසයි.
ගෞරවනීය ස්ථානයක තිබිය යුතු දේශපාලනය විහිළුවක් ලෙස හෝ කාණු පල්ලේ ලා සැලකීම ඉතාමත් භයානක යැයි ඇය ප්‍රකාශ කළේ 12 සඳුදා ශ්‍රී ලංකා පදනම් ආයතනයේ දී පැවැත්වුණු ප්‍රජාතන්ත්‍රවාදය වෙනුවෙන් විද්වත් පෙළගැස්ම කතිකාවට එක් වෙමිනි.
හුදෙක් දේශපාලන තර්කයක් ලෙස ගනිමින් ප්‍රජාතන්ත්‍රවාදය මගහැරීමේ ප්‍රතිවිපාක අපි අද අත්විඳිමින් සිටින බව ද ආචාර්යවරිය එහිදී පැවසුවා ය.
“ආර්ථික ප්‍රජාතන්ත්‍රවාදය, සමාජීය ප්‍රජාත්නත්‍රවාදය, සංස්කෘතික ප්‍රජාතන්ත්‍රවාදය අපි අතින් ගොඩක් වෙලාවට මග හැරුණා. ප්‍රජාතන්ත්‍රවාදයේ ව්‍යුහාත්මක බව අතහැරලා යම්කිසි දේශපාලන තර්කයක් හැටියට විතරක් මතු කළ අවස්ථා විතරයි බොහෝ වෙලාවට දක්නට ලැබුණේ. අද දවසේ අපි අත්විඳින්නේ එහි ප්‍රතිවිපාක. ඉතාම ඛේදනීය අවස්ථාවක හිඳිමින් නැවත වතාවක් අපිට ප්‍රජාතන්ත්‍රවාදය ගැන කතා කරන්න වෙලා තියෙනවා. අපි ඒ ගැන කතා කළ යුතුයි. නමුත් මින් ඉදිරියට එය කළ යුත්තේ සිවිල් සාමාජිකයින් හැටියට අපිට මහහැරුණු ප්‍රජාතන්ත්‍රවාදී අරගල අවස්ථා වලදී අපි කොහෙද හිටියේ කියන එකත් ඔලුවේ තියාගෙන තමයි.”
වත්මන් අර්බුදය පිළිබඳ කතාබහ ගොඩනැගෙන විට එය පිරිසක් ව්‍යවස්ථාමය ගැටළුවක් ලෙසටත් තවත් පිරිසක් විහිළුවක් ලෙසටත් ගෙන ඇති බවටත් ආචාර්ය හරිනි අමරසුරිය පවසන්නීය.
“මේ දවස් වල සමාජ මාධ්‍ය ජාලය හරහා අර්බුදය ගැන කතා වෙනකොට එය ව්‍යවස්ථාව පිළිබඳ ගැටළුවක් හැටියට දකිනවා. ව්‍යවස්ථාව කොහොමද අර්ථකථනය කරන්නේ? කවුද අර්ථ කථනය කළ යුත්තේ? කොහොමද අර්ථ කථනය විය යුත්තේ? කියන සාකච්ඡාව යනවා. අනිත් පැත්තට මේක මහා විහිළුවක් බවට පත්ව තිබෙනවා. එය විහිලුවට ලක්කරමින් පෝස්ට් 1000 ක් විතර දවසකට ෆේස්බුක් එකේ දානවා. විවිධ තල වලින් ප්‍රජාතන්ත්‍රවාදයත් විහිලුවට ලක්කරලා දේශපාලනයත් විහිලුවට ලක් කරලා සියල්ලම මහා විහිළුවක් බවට පත් කරලා. මම හිතන්නේ මේක ඉතාමත් භයානකයි.”
“එක පැත්තකින් මේක ව්‍යවස්ථාව පිළිබඳ ගැටළුවක් නෙවෙයි. මටනම් මෙය දැනෙන්නේ ව්‍යවස්ථාව අපි එකිනෙකාට විවිධ විදියට අර්ථකථනය කරන්න පුළුවන්. මෙය ව්‍යවස්ථාවට එහා ගිහිල්ලා සදාචාරාත්මක ප්‍රශ්නයක් බවට පත් වෙලා. දේශපාලකයන්ගෙන්, දේශපාලන පක්ෂ වලින් සදාචාරයක් බලාපොරොත්තු විය යුතුයි. එය විහිළුවක්, කාණුවේ තියෙන දෙයක් හැටියට සැලකීම මේ මොහොතේ ඉතාම භයානක දෙයක්. දේශපාලනය ගෞරවනීය ස්ථානයක් තබමින් මිට වඩා සදාචාරාත්මක දෙයක් බවට පත් කිරීමට අපි සටන් කළ යුතුයි,පෙනී සිටිය යුතුයි කියලා මම තරයේ විශ්වාස කරනවා.”