උද්ඝෝෂණ නොකර රෝගී ජනතාවට පීඩා නොවන ආකාරයට ඖෂධවේදී හිඟයට පිළියම් සොයමු යැයි විපක්ෂ නායක සජිත් ප්‍රේමදාස මහතා පැවසීය.
විපක්ෂ නායකවරයා මේ බව කියා සිටියේ පෙරේදා (19) ‘පුරවැසි හඬ’ වැඩසටහන යටතේ සමස්ත ලංකා පෞද්ගලික ඖෂධ ශාලා හිමියන්ගේ සංගමයේ සාමාජිකයන් සමඟ විපක්ෂ නායක කාර්යාලයේදී පැවති හමුවකදීය.
එහිදී වැඩිදුරටත් අදහස් දැක්වූ විපක්ෂ නායකවරයා මෙසේ ද කීවේය.
“ෆාමසියකින් නියමිත මාත්‍රාවලට අනුව ඖෂධ දීම නිපුණතා ක්‍රියාදාමයක්. එය වැදගත් ක්‍රියාදාමයක්. රජයේ රෝහල්වල පවා ඖෂධවේදීන්ගේ හිඟයක් තිබෙනවා. එම නිසා ප්‍රතිපත්තිමය වශයෙන් නිවැරදි තැන සිටගත යුතුයි. ඖෂධවේදියාගේ ක්‍රියාවලිය නිපුණතා සහිත ක්‍රියාවලියක් නිසා ඒ සුදුසුකම සහිත අයෙක් ක්‍රියාත්මක කළ යුතුයි.
5000කට ආසන්න ඖෂධ ශාලා තිබුණත් මේවාගේ බහුතරයක ඖෂධවේදීන් නෑ. මේ ගැටලුවට විසඳුමක් ලැබෙන කාලරාමුවක් සහිත වැඩපිළිවෙළක් අවශ්‍යයි. මේ ගැටලුවට උත්තරය ෆාමසි වැසීම හෝ සිතූ සිතූ ආකාරයට වැඩ කිරීම නොවේ. මේ ගැටලු මුල්කරගෙන පාරට බැස්සොත් දේශපාලන පක්ෂවලට වාසි වුවත් ජනතාවට වාසි නොවන නිසා මේවා මුල් කරගෙන පාරට බැසීම නොකරන ලෙස ඉල්ලා සිටිනවා.
පොදු ජනතාව ගැන සිතා කටයුතු කළ යුතුයි. මේ සම්බන්ධ වැඩපිළිවෙළක් පාර්ලිමේන්තුවට ඉදිරිපත් කරනවා. මේ හිඟය නැති වනතුරු මැද තැනක සිට කටයුතු කරන්න කියා ඉල්ලා සිටිනවා. ඒ සඳහා උසස් පෙළ සමත් අය පොරොත්තු ක්‍රමවේදය තුළ අතරමැදි පුහුණුවකට ලක් කර අධීක්ෂණය යටතේ සේවයට යොදා ගන්නා ලෙස ඉල්ලා සිටිනවා.”