නව අධ්යාපන ප්රතිසංස්කරණයට අදාළව මේ වසරේ සිට ක්රියාත්මක කිරීමට නියමිතව පැවති 06 වැනි ශ්රේණියේ විෂයමාලා ප්රතිසංස්කරණය නැවත සමාලෝචනය කර 2027 වසරේ සිට ආරම්භ කිරීමට රජය තීරණය කර තිබේ.
පළමු ශ්රේණියේ අධ්යාපන ප්රතිසංස්කරණ මේ වසරේදී එලෙසම ක්රියාත්මක කරන බව කැබිනට් මාධ්ය හමුවේදී කැබිනට් ප්රකාශක, ඇමැති වෛද්ය නලින්ද ජයතිස්ස මහතා ඊයේ (13) පැවසුවේය.
ප්රශ්නගත 6 වැනි ශ්රේණියේ ඉංග්රීසි මොඩියුලයට අදාළව අපරාධ පරීක්ෂණ දෙපාර්තමේන්තුව සහ අධ්යාපන අමාත්යාංශය විසින් සිදු කළ විමර්ශන වාර්තාවෙන් ලද ප්රතිඵල මත ජාතික අධ්යාපන ආයතනයේ පාලන සභාව විසින් අදාළ සිදුවීමට වගකිව යුතු නිලධාරීන්ට එරෙහිව විනය ක්රියාමාර්ග ගැනීමට නියමිත බව ද ඇමැති නලින්ද ජයතිස්ස මහතා කියා සිටියේය.
මානව සම්පත් සංවර්ධනය, යටිතල පහසුකම් සංවර්ධනය හා පරිපාලන ප්රතිසංස්කරණ, තක්සේරු සහ ඇගයීමේ කටයුතු, විෂයමාලා සංවර්ධනය සහ මහජන දැනුවත්භාවය හා ප්රවර්ධනය යන ප්රධාන කුලුනු 5ක් මත අදාළ අධ්යාපන ප්රතිසංස්කරණ කටයුතු එලෙසම ක්රියාත්මක කරන බව ද ඇමැතිවරයා පැවසීය.
“අධ්යාපන ප්රතිසංස්කරණවල එක කුලුනක් වන මානව සම්පත් සංවර්ධනය සඳහා අධ්යාපන පරිපාලන සේවයට 2017න් පසු බඳවා නොගත් 502ක් බඳවා ගෙන උසස් වීම් 306 දෙනකුට ලබා දී 800කට වැඩි ප්රමාණයකට පුහුණුවීම් ලබා දෙමින් පවතිනවා. ගුරු අධ්යාපනඥයන් 580ක් බඳවා ගෙන පුහුණුවීම් කරගෙන යනවා. පසුගිය කාලයේ දී ගුරුවරුන් 4,134ක් බඳවා ගැනීමට කටයුතු කළා. තවත් ගුරුවරුන් 23,344ක් කඩිනමින් බඳවා ගන්න කටයුතු කරනවා.
6 වැනි ශ්රේණියේ අධ්යාපන ප්රතිසංස්කරණ පිළිබඳ යම් ව්යාකූලත්වයක් ඇති කරන්න කටයුතු කරමින් ඉන්නවා. රජය විශ්වාස කරනවා අවම අවිශ්වාසයක් හෝ තියාගෙන මේ අධ්යාපන ප්රතිසංස්කරණ එලෙසටම ඉදිරියට යන්න බැහැ කියලා. යම් වෙනසක් කළ යුතුයි කියන එක අපි පිළිගන්නවා. මානව සම්පත් සංවර්ධනය, යටිතල පහසුකම් සංවර්ධනය, තක්සේරු සහ ඇගයීම, මහජන දැනුවත්භාවය සහ ප්රවර්ධනය කියන කරුණු එලෙසම පවත්වාගෙන යනවා.” යැයි ද හෙතෙම මෙහිදී පැවසීය
6 ශ්රේණියේ ප්රතිසංස්කරණ 2027ට කල් යයි -කැබිනට් ප්රකාශක, ඇමැති වෛද්ය නලින්ද ජයතිස්ස
