පාර්ලිමේන්තු බහුතරය ලබාගැනීමට අපොහොසත් බැවින් ඉදිරියටත් ධූරයේ රැඳී නොසිට ඉල්ලා අස්වෙන ලෙස 15 දෙනකුගෙන් සැදුම්ලත් ශ්‍රී ලංකා නිදහස් පක්ෂ මන්ත්‍රීවරු කණ්ඩායමක් කුමන්ත්‍රණ ආණ්ඩුවේ අගමැති මහින්ද රාජපක්ෂගෙන් ඉල්ලා ඇතැයි වාර්තා වේ.
දේශපාලන ආරංචි මාර්ග සඳහන් කරන ආකාරයට මෙම හමුව සිදුව ඇත්තේ අද (28) කොළඹ විජේරාම මහින්ද රාජපක්ෂ නිළ නිවසේ දී ය.
පවත්නා දේශපාලන ව්‍යාකුල ස්වභාවය හමුවේ ජනාධිපතිවරයා අනවශ්‍ය ලෙස අපකීර්තියට පත් වන බවත් ශ්‍රී ලංකා නිදහස් පක්ෂය ද අර්බුදයට පත්වන බවත් මන්ත්‍රී කණ්ඩායම එහිදී පෙන්වා දී ඇතැයි වාර්තා වේ.
ඊට ප්‍රතිචාර දක්වමින් නිත්‍යානුකුල නොවන ආණ්ඩුවේ අගමැති මහින්ද රාජපක්ෂ පවසා ඇත්තේ එසේ ඉල්ලා අස්වීමේ අවශ්‍යතාවයක් තමන්ට නොමැති බවයි. විශේෂයෙන්ම තම බිරිඳ ශිරන්ති රාජපක්ෂ සහ දරුවන් තිදෙනා ද එවැනි තීරණයකට විරුද්ධ වන බවත් ඔහු සඳහන් කර ඇත. එසේම ජනාධිපති මෛත්‍රිපාල සිරිසේන අපකීර්තියට පත්වීමේ තමන්ගේ ගැටළුවක් නොවන අතර ඊට ජනාධිපතිවරයාත් වගකිව යුතු බව පවසා තිබේ.
කෙසේ වෙතත් දේශපාලන තීන්දුවක් ගැනීමට තමන්ට 7 වැනිදා දක්වා කල් ලබා දෙන මෙන් හිටපු ජනාධිපතිවරයා ඉල්ලා ඇති බව වැඩිදුරටත් වාර්තා වේ.