කුමන්ත්‍රණ ආණ්ඩුවේ අගමැති වැය ශීර්ෂය කපා හැරීමේ යෝජනාවට පක්ෂව ඡන්ද 123 ක් ලැබීමත් සමඟ එය අද (29) පාර්ලිමේන්තුවේදී සම්මත විය.
මෙම යෝජනාව පාර්ලිමේන්තු මන්ත්‍රී රවී කරුණානායක විසින් සභාවට ඉදිරිපත් කළේය. ස්ථිර කරන ලද්දේ නවින් දිසානායක පාර්ලිමේන්තු මන්ත්‍රීවරයා විසිනි.
ඒ අනුව ඉලෙක්ට්‍රොනික ක්‍රමයට පැවැත්වූ ඡන්ද විමසීමේදී එක්සත් ජාතික පක්ෂය, ජනතා විමුක්ති පෙරමුණ සහ දෙමල ජාතික සන්ධානය අගමැති කාර්යාලයේ වියදම් කපා හැරීමේ යෝජනාවට පක්ෂව ඡන්දය භාවිත කළ අතර ඊට විරුද්ධව එක් ඡන්දයක් හෝ නොලැබුණි.
ඒ අනුව මෙම යෝජනාව වැඩි ඡන්ද 123 කින් සම්මත කළ බව කතානායක කරූ ජයසුරිය නිවේදනය කළේය.