ගතවූ අවසන් පැය 48 ඇතුළත දරුවන් 12 දෙනකු ඇතුළු පුද්ගලයන් 33 දෙනකු මන්දපෝෂණයෙන් මිය ගිය බව ගාසා තීරයේ සෞඛ්‍ය අමාත්‍යාංශය නිවේදනය කර ඇතැයි විදෙස් මාධ්‍ය වාර්තා කරයි. මේ ඛේදජනක පුවත වාර්තා වී ඇත්තේ ගාසා තීරයේ වැසියන්ට ජීවත්වීමට ලැබුණු අවසන් අවස්ථාවත් බිඳ වැටෙමින් පවතින බවට එක්සත් ජාතීන්ගේ සංවිධානයේ මහලේකම් ඇන්ටෝනියෝ ගුටාරෙස් කළ අනතුරු ඇඟවීමට පසුව බව ද විදෙස් මාධ්‍ය වැඩිදුරටත් වාර්තා කරයි. වසර 2023 දී ගාසා යුද ගැටුම් ආරම්භ විමෙන් පසු මේ දක්වා මන්දපෝෂණය හේතුවෙන් මිය ගිය සිවිල් වැසියන්ගේ සංඛ්‍යාව 101ක් වන බවත්, ඊට දරුවන් 80 දෙනකු ඇතුළත් වන බවත් සඳහන් වේ.
ගාසා තීරයේ මානුෂීය ආධාර අවහිර කිරීමට ඊශ්‍රායල හමුදාව පියවර ගැනීමෙන් පසු බලපා ඇති දරුණු ඉන්ධන හිඟය හේතුවෙන් රෝහල් ගණනාවක් වසා දැමීමේ අවදානමක් ද මතුවී ඇති අතර, ඉන්ධන හිඟය හේතුවෙන් රෝහල් ගණනාවක ක්‍රියාකාරිත්වයට බාධා එල්ල වී ඇති බැවින් සායන හා සෞඛ්‍ය මධ්‍යස්ථාන 6ක් ඊයේ වසා දැමීමට සිදුවූ බව ගාසා සෞඛ්‍ය අමාත්‍යාංශය ප්‍රකාශ කර ඇතැයි විදෙස් මාධ්‍ය සඳහන් කරයි
ගාසා තීරයේ සිවිල් වැසියෝ 33ක් මන්දපෝෂණයෙන් මිය යති -දරුවන් 12ක් ඒ අතර
