වත්මන් ආණ්ඩුවේ ප්‍රතිපත්තිවලින් 99%ක්ම රනිල් වික්‍රමසිංහ මහතා හදපුවා යැයි ශ්‍රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතා රත්නපුරදී ඊයේ (27) පැවැසීය.
ආණ්ඩුව තමන්ගේ පැවැත්මට අදාළව අධ්‍යාපන ප්‍රතිසංස්කරණ ගැන කතා කළත් අනාගත පරපුර ගැන සිතා නව අධ්‍යාපන ක්‍රමවේදයක් පිළිබඳ කතා කරන්නේ නැතැයිද හෙතෙම කීවේය. පාර්ලිමේන්තු මන්ත්‍රී නාමල් රාජපක්ෂ මහතා මෙසේ ප්‍ර‍කාශ කර සිටියේ රත්නපුර, එරත්න හා පැල්මඬුල්ල යන ප්‍රදේශවල සංවිධාන කර තිබූ පක්ෂ ක්‍රියාකාරීන්ගේ සාකච්ඡා කිහිපයකට පෙර සබරගමුව මහ සමන් දේවාළයට පැමිණ දේව ආශීර්වාදය ලබා ගැනීමෙන් අනතුරුව මාධ්‍යට අදහස් දක්වමිනි.
මෙහි දී වැඩිදුරටත් අදහස් දැක් වූ නාමල් රාජපක්ෂ මහතා මෙසේද පැවැසීය.
‘‘අපි බලන්න ඕනි මේ අධ්‍යාපන ප්‍රතිසංස්කරණ රනිල් වික්‍රමසිංහ මහත්තය හදපු ඒවදම කියල. ආණ්ඩුවේ ප්‍රතිපත්තිවලින් 99%ක්ම තිබෙන්නේ රනිල් වික්‍රමසිංහ මහත්තය හදපු කාරණා. මේකත් ඔහුගේ ප්‍රතිපත්තියක් කියන සැකය අපට තිබෙනවා. අපිට පේන්නේ අග්‍රාමාත්‍යවරියත් වෙන නමක් දාලා අර ප්‍රපෝසල් එකම ගෙනත් කියන එකයි. ආණ්ඩුව හිතනවා නම් ජේවීපී එකට අවශ්‍ය විදිහේ අධ්‍යාපන ක්‍රමයක් මේ රටේ බිහිවිය යුතුයි කියලා ආණ්ඩුවට යෝජනා දෙකක් ඉදිරිපත් කරන්න කැමතියි. එකක් තමයි මුලින්ම ළමයින්ට උගන්වන්න පුළුවන් විදිහට ගුරු සංවිධාන ටික හදා ගන්න කියන එක. අනික් කාරණය නම් විශ්වවිද්‍යාලවල නවකවධය දෙන තමන්ගේ ශිෂ්‍ය සංවිධාන ටික හදා ගන්න කියන එක. ආණ්ඩුවේ ශිෂ්‍ය සංවිධාන තමයි නවක වධය දෙන්නේ. අලුත් දේශපාලන සංස්කෘතියක් ගේනවනම් මෙතනින් පටන් ගන්න කියලා ආණ්ඩුවට යෝජනා කරනවා යැයි හෙතෙම කීවේය.