මීළඟට පැවැත්වෙන සෑම මැතිවරණයක් සඳහාම පොහොට්ටුව ළකුණ යටතේ තරඟ කළ යුතු බව ශ්‍රී ලංකා පොදු ජන පෙරමුණේ ලේකම් නීතිඥ සාගර කාරියවසම් පවසා තිබේ. එහිදී ලංකා ඉතිහාසයේ කිසිදු දිනක ප්‍රධාන පක්ෂයක් කුඩා පක්ෂයක් යටතේ තරඟ කර නැති බව පවසයි. ඒ අනුව ශ්‍රී ලංකා නිදහස් පක්ෂයටද පොහොට්ටුව ළකුණ ඇති තම පක්ෂය යටතේ තරඟ කිරීමට කාරියවසම් මහතා ආරාධනා කර තිබේ. ඒ සඳහා සන්ධානගත වී සාකච්ඡා කළ හැකි බව ඔහු පවසා ඇත.
පොහොට්ටුව ළකුණ හැර වෙනත් කුඩා පක්ෂයක් යටතේ සිය පක්ෂය කිසිසේත් තරඟ නොකරන බව සාගර කාරියවසම් මහතා තවදුරටත් සඳහන් කර තිබේ.
මේ යන විදියට ශ්‍රී ලංකා නිදහස් පක්ෂයේ අත ළකුණ ජී. එල්.පීරිස්ගේ පොහොට්ටුවට යට වනු ඇත. ජනාධිපති සිරිසේන ඇතුළු ශ්‍රීලනිප නඩයට පොහොට්ටුවට යටත් වීමට සිදු වනු ඇත. ශ්‍රීලනිපය තව තවත් දෙකඩ වීම කිසිවෙකුටත් වැළැක්විය නොහැකිය. ඒ ඛේදජනක තැනට ශ්‍රීලනිපය තල්ලු කළේ අන් කවරෙක්වත් නොව සිරිසේන ජනාධිපතිවරයාමය.